Nakapag-rehistro an Bulkang Kanlaon nin panibagong aktibidad sa nakalihis na 24 oras segun sa daily monitoring na ipinaluwas kan Philippine Institute of Volcanology and Seismology (Phivolcs).
Segun sa datus, an bulkan nagpaluwas nin 900 metros na langkaw na plume na may kaibang periodic ash asin 35 volcanic earthquakes, kabali an 11 pagyugoyugo na nagdurar nin poco mas o menos 4 hasta 38 minutos.
Kasunod kaini, nakarekord man an Kanlaon nin 14 na pagtuga nin mahibog na abo asin nanutaran man an paghibog kan crater kaini.
Mientrastanto, segun sa PHIVOLCS, dakula an tsansa na maideklarar na Alert Level 4 an bulkan enkaso madagos an mga aktibidad na ini.
Sa ngunyan, naitaas pa man giraray an Alert level 3 sa bulkan, kun sain ipinagbabawal pa man giraray an anuman na klase nin eroplano na maglayog harani sa alitoktok kan bulkan asin maglaog sa lugar na nasa laog nin anom na kilometrong radius hali digdi.
Pigpapatanidan pa man giraray an mga residentes sa mga posibleng pagbagsak nin gapo, biglang pagsabog, pagtuga nin lava, asin padagos na pag-uran nin abo.
