Nagpaluwas nin haros 3,000 tonelada nin sulfur dioxide an Bulkang Kanlaon kan nakalihis na aldaw nin Sabado asin nakarekord nin 17 volcanic earthquake kan sumunod na aldaw basado sa enot na report kan Philippine Institute of Volcanology and Seismology (PHIVOLCS).
Kasabay kan mga linog na hale sa bulkan, an Kanlaon nakarekord man nin tolong ashing events asin naheling man an paghubag o ground deformation sa nguso kaini.
Tulos na pigbandera sa Alert Level 2 an bulkan huli sa serye nin makusog na pagtuga kaini na igwa nin langkaw na 500 metros.
Sa irarom kan alert level 2, pinapagirumdom an mga residentes sa lugar na mahigot na ipinagbabawal an paglaog sa apat na kilometrong radius kan permanent danger zone sa Bulkang Kanlaon huli sa posibilidad na magkaigwa nin phreatic explosions.
