Pigkumpirmar kan Department of Justice na saindang pormal nang naisuinad sa korte an kaso kontra sa kontratistang si Sarah Discaya na igwang kinaaraman sa isyu kan pagbabayad nin buwis.
Sigun ki Justice Spokesperson Atty. Polo Martinez, susog ini sa natukoy kan prosekusyon na igwang bastanteng batayan tanganing isunad na komo kaso an reklamong kinakahampang ni Discaya.
Nadedetermina kan panel of prosecutors an pagkakaigwa nin ‘prima facie evidence with certainty of conviction’ kun kaya pigsakat na sa korte an kaso.Partikular na saindang pigsunadan nin apat (4) na numero kan kasong ‘tax evasion’ an kontratista nag-ugat sa bigong pag-utob na bayadan nin tama an magkakanigong buwis sa taxable year 2020 asin 2021.
Paliwanag kan nasambitan ng tagapagtaram kun tano four (4) counts tax evasion case an pigsunad an huli sa kada taxable year na nabanggit, nahilingan ini nin pagbalgar sa Sections 254 asin 255 kan National Internal Revenue Code kan nasyon.
Sa irarom kaya kan ley, saiyang ginibong intensyunal na takasan an tamang pagbabayad nin buwis asin pati an bigong pagheheras kan tunay na impormasyon dapit sa bayadan.
Opisyal na pigsunad an nasambitan ng mga kaso sa Court of Tax Appeals kan nakalihis na Pebrero 3 kan presenteng taon.
Apwera ki Sarah Discaya, nahahampang ini sa kaparehas na kaso an saiyang agom na si Pacifico ‘Curlee’ Discaya.
Alagad aminado an Department of Justice na kumparar sa babaeng Discaya, ipigpauktaba munang makasuhan sa korte si Curlee Discaya. Sigun ki Justice Spokesperson Martinez, nagsunad nin mosyon an kampo ni Discaya na nagresulta tanganing dae madagos an pagsusunad nin kaso.
Pigpaparekonsederar an pagsusunad nin impormasyon o resolusyon kan prosekusyon kun kaya pighagadan an Bureau of Internal Revenue na magsumiter kan saindang kumento.
Huli digde, pighahalat kan prosekusyon an ipapasang kumento kan ahensiya mantang nagpapadagos an preliminary investigation antes pormal na resolbaron an reklamo asin isunad komo kaso.
