Nag-abot na sa 94,228 indibidwal an apektado kan padagos na pag-aalboroto kan Bulkang Kanlaon sa Negros Island, sigun sa Department of Social Welfare and Development (DSWD).
Basado kaya sa Disaster Response Operations Monitoring and Information Center (DROMIC) kan DSWD, 5,940 indibidwal an nasa evacuation centers, mantang 10,621 man an paramientras ma nakikidagos sa ibang lugar.
Naraot man nin bahagya an 5, 031 kaharongan dara kan volcanic activity.Siring man, nagheras na an DSWD nin P192.7 million kantidad nin tabang sa mga apektadong pamilya.
Sigun man sa report kan Philippine Institute of Volcanology and Seismology (Phivolcs), nakapgkurit nin 10 volcanic earthquakes sa palibot kan Kanlaon asin nagbuga ini nin 1,590 tonelada kan sulfur dioxide kan nakalihis na Sabado, Hulyo 5 kun saen nag-abot hasta 650 meter an langkaw kan pigbugang asupre.
Nagtitinir man sa Alert Level 3 an bulkan, na boot sabihon igwang magmatic unrest asin posibilidad kan pagsabog.
Pigrekomendar kan Phivolcs an tulos na pag-ebakwar sa laog kan anom na kilometrong danger zone asin pagbabawal sa paglupad kan anumang aircraft harani sa bulkan.
Pigpatanid man kan ahensiya sa publiko an mga peligro siring kan biglaang pagsabog, pagdaloy kan lava, pag-uran nin abo, pagbagsak kan gapo, sa panahon kan makukusog na uran asin pyroclastic flow.
