Pig-orgulyo an naireport kan Malakanyang na pinahewas pa kan Philippine Health Insurance Corporation (Philhealth) an benepisyo para sa mga pasyenteng igwa nin helang na Malaria.
Susog ki Palace Press Officer USec. Claire Castro na ini an kasimbagan kan gobyerno sa pangapudan kan World Health Organization na magkasararo kontra sa helang na Malaria.
Sinaysay ni Castro na gikan sa dating P780, piglangkaw sa P1,170 an benepisyo para sa diagnostic test, bulong asin konsultasyon.
Sakop na man an pagpapabulong sa uncomplicated malaria sa paagi man kan P5,460 na package sa primary care asin man hasta sa P7,800 para sa mga pasyenteng kaipuhan na maospital.
Sigun ki Dr. Edwin Mercado kan PhilHealth, an bagong malaria package an parte kan mas pinahigot na lakdang tangani magin mas marikas, barato, asin komprehensibo an serbisyong pangsalud para sa gabos.
Obheto kaining suportaran an target kan nasyon na dagusang wakasan an malaria sa taong 2030. Sigun sa Palasyo, saindang pigkaoma an padagos na pagtutok kan administrasyong Marcos sa kapakanan asin salud kan kada Pinoy, orog na sa hampang kan huma kan mga helang siring na sana kan malaria.
