NAGA CITY- Sinabat nin mainit na bakbakan sa pag-ultanan kan tropa kan gobyerno asin mga pigtutubudang miyembro kan rebeldeng New People’s Army (NPA) sa banwaan nin Ragay, Camarines Sur an pagpuon kan Semana Santa sa Bicol.
Sa nagunong impormasyon kan Bombo Radyo Naga, napag-araman na nagkokondusir nin operasyon an pinagsarong pwersa kan mga kasoldadusan hale sa 9th Infantry Battalion , 93rd Division Reconnaissance Company asin 22nd Infantry Battalion kan manutaran kan mga ini an pigkakarkulong 20 mga miyembros kan Bicol Regional Party Committee (BRPC) kan rebeldeng grupo sa barangay Agao-ao sa nasambitang banwaan.
Naghaloy nin haros 35 minuto an riribayan nin putok kan duwang lado asin narekober sa pinangyarihan an tolong improvised explosive device (IED), limang (5) backpack na naglalaog nin personal na mga kagamitan, sarong laptop, cellphone, walong blasting cap, asin mga subersibong dokumento.
Mayo man suboot nairehistong nairido sa lado kan gobyerno.
Katakod kaini, pigsierto man kan manhamiento kan 9th Infantry Division, Philippine Army na mas papahiguton pa ninda an mga operasyon kan militar para mapugulan an anumang planong pag-atake kan mga NPA na nakatalaan na maselebrar kan saindang ika-50 anibersaryo sa maabot na Marso 29.
