NAGA CITY- Pig-apod komo in-sensitive kan tagapagtaram kan Bayan Bicol an pigtagama na nasa P20-M na pondo para sa isasagibong SONA ni Presidente Ferdinand Bongbong Marcos Jr sa Lunes, July 22, 2024.
Sa entrevista kan Bombo Radyo Naga ki Jen Nagrampa, Chairperson kan Bayan Bicol, sinaysay kaini na an nasambitan ng kantedad nin kwarta an magagamit na kuta sa pagsimbag sa manlaen-laen na problema na kinakahampang kan nasyon sa presente siring na sana kan kapagteosan, trabaho, kakulangan nin classroom kan mga kaakian, problema sa transportasyon asin iba pa na mga importanteng bagay.
Sigun pa ki Nagrampa, pwede man kuta na magsagibo nin SONA na dae magarbo asin simple sana alagad pinili kan presenteng administrasyon an siring na set up.
Huli kaini, an nasambitan ng aksyon an maikokonsederar na insensitibo para sa mga namamanwaang Pilipino na namamatean pa man giraray an labing kapagteosan.
Sa ngunyan, mawot na sana kan opisyal na madangog kan Presidente an agrangay kan gabos na mga Pilipino kasabay kan saiyang ikukundusir na ikatolong state of the nation address.
