Naitala ang “minimal traffic” sa Strait of Hormuz ngayong Sabado, Abril 11, 2026, batay sa ship tracking data, kasabay ng patuloy na tensyon sa Gitnang Silangan sa kabila ng umiiral na tigil-putukan.
Ayon sa data mula sa MarineTraffic, halos walang galaw ang mga barko sa mahalagang ruta ng langis habang nagpapatuloy ang krisis sa rehiyon.
Naganap ito isang araw matapos dumating sa Islamabad ang negotiating team ng Iran para sa usapang pangkapayapaan kasama ang Estados Unidos.
Nauna rito, inanunsyo ni Donald J. Trump ang dalawang linggong ceasefire noong Abril 7 sa pagitan ng Estados Unidos at Iran, na pansamantalang nagpatigil sa airstrikes ng US at Israel laban sa Iran.
Gayunman, nananatiling sarado ang Strait of Hormuz dahil sa blockade ng Iran, na patuloy na nagpapabigat sa pandaigdigang suplay ng enerhiya at nagpapalala sa krisis sa langis.
Kasabay nito, nagpapatuloy din ang hiwalay na tensyon sa pagitan ng Israel at grupong Hezbollah sa Lebanon, na lalo pang nagpapakumplikado sa sitwasyon sa rehiyon.
Ayon kay Iranian parliamentary speaker Mohammad Baqer Qalibaf, hindi pa sisimulan ang pormal na negosasyon hangga’t hindi natutupad ang mga naunang kondisyon, kabilang ang pagbabalik ng Iranian assets at ceasefire sa Lebanon.
Patuloy na minomonitor ang sitwasyon sa Strait of Hormuz, na nananatiling isa sa pinakamahalagang chokepoint ng pandaigdigang kalakalan ng langis.
