NAGA CITY – Pigkundusir sa siyudad nin Naga an Bloodletting Activity komo parte kan duwang aldaw na selebrasyon kan Barangay Day.
Sa entrevista kan Bombo Radyo Naga ki Felix Mathias Largo, Sr., Kapitan kan nasambitan ng barangay, sinaysay kaini na sa duwang aldaw na selebrasyon, pigsagibo an libreng pagupit, Mobile Blood Donation asin iba pang aktibidad.
Mientrastanto, sigun man ki Marcon Matos, RN, Naga City Blood Bank Nurse Coordinator, na an bloodletting piggigibo ninda sa lambang barangay kan siyudad.
Sigun ki Matos, hababa an nakastock na dugo sa saindang opisina kun kaya nakared code an bilog na probinsya kan Camarines Sur.
Katakod kaini, mapadagos man an saindang Mobile Blood Donation sa iba pang barangay kan siyudad orog na ta igwa pa nin mga nakaschedule.
Saro man ini sa lakdang tanganing masimbagan an siring na huma na kinakahampang kan saindang opisina. Piglinaw man ni Matos na libreng nakukua an dugo gikan sa mga nagdodonar asin basado man sa RA 7719 o an pagbabawal sa pagbakal nin dugo.
Apwera pa digdi, nagpartisipar man sa nasambitan ng aktibidad an nagkapirang personahes kan Naga City Police Office.
Sigun ki PSSG Vince Bermejo, PCR PNCO, Naga City Mobile Force Company, na tuyong igwa nin request an barangay sa saindang hepatura, nagpapadara sinda nin mga personahes tanganing magdonar nin dugo.
Saro pa kaya ini sa saindang obligasyon asin pagpapahiling komo Makatao.
Sa ngunyan, pig-enkaminar na sana kan mga ini an publiko na magpartisipar sa siring na aktibidad orog na ta an pagdodonar nin dugo an masumpay sa buhay kan tawo.
