NAGA CITY- Nagtutubod si Presidential Spokesperson Harry Roque na posibleng ikonsiderar kan nagkakapirang mga nasyon na miyembro kan International Criminal Court (ICC) an pagbawi na kan saindang suporta igdi.
Sigon ki Sec. Roque, posibleng magbutas naman an nagkakapirang nasyon sa nasambitang kasunduan huli naman sa ginibong pag-breach suboot kan prosecutor kan ICC sa principle of complimentarity.
Sigon saiya, sa irarom kan prinsipyong ini, makikiaram sana an ICC sa sarong nasyon kun dae na nag-gagana an mga domestic courts digdi.
Enot kaini, pig-enkaminar ni Presidente Rodrigo Duterte an iba pang mga miyembros kan ICC na magbutas naman arog kan saiyang ginibo.
Mientrastanto, pinaliwanag man kan opisyal na nagtetenir pa nanggad an saiyang enot na posisyon asin paghiling sa nasambitang kasunduan urog na sa mga prinsiyo kaini sa pagbilog kan ICC alagad pabor man suboot siya sa desisyon ni presidente Duterte na mag-withdraw huli naman sa pangingiaram kan mga prosecutor kan ICC sa Pilipinas.
Ini an sinaysay ni Roque makalihis na magluwas sa social media an nagkakapira sa saiyang mga personal na opinyon na garo pagtatao nin pag-omaw sa pagiging miyembro kan Pilipinas sa ICC.
Pigklaro kan opisyal na an nasambitang mga social media post, ginibo niya kan dae pa siya miyembro kan gabinete kan hepe ehekutibo.
Komo sarong presidetial spokesperson, kinakaipuhan niya suboot isuway an saiyang personal na opinyon sa nagkakapirang pag-urulay huli ta an mga pahayag sana kan hepe ehekutibo an dapat niya ng iheras sa publiko.
