NAGA CITY- Pigpahayag kan sarong konsehal sa siyudad nin Naga na igwang nagkapirang mga menor de edad an nagagamit sa operasyon kan iligal na droga.
Sa nagin paghampang sa mga kagawad kan media ni Naga City Councilor Omar Buenafe, sinaysay kaini na dae na soboot bago an siring na senaryo orog na ta an mga menor de edad an dae masyadong pigpapansin o pigdududahan.
Siringman an mga minor an dae pwedeng ikulong kun kaya igwang nagkapirang grupo na ginagamit an mga ini sa iligal na transaksyon.
Huli kaini, kaipuhan talaga an mahigot na implementasyon kan curfew ordinace tanganing masierto na mayo ng mga menor de edad an yaon sa mga tinampo tuyong bangi o sa mga alanganin na oras.
Apwera digde, pig-enkaminar man kan opisyal an mga magurang na pirmeng i-check an saindang mga kaakian kun siisay an mga kaibahan asin ano an mga aktibidad tanganing mailikay an mga ini sa maraot na gibuhon.
Katakod digde, nakikipag-koordinar man soboot an mga kapulisan sa Naga City Social Welfare and Development Office, tanganing maaksyunan a problema asin maisalbar an mga menor de edad sa siring na sitwasyon.
Sa ngunyan, pinagirumduman na sana kan opisyal an mga jovenes na dae pagsayangon an panahon sa mga mararaot na gibo asin maglapigot para sa ikakarahay kan saindang futuro sa maabot na panahon.
