Pigbuyagyag ni Bicol Saro Partylist Rep. Terry Ridon na an net worth ni Bise Presidente Sara Duterte naglangkaw nin poco mas o menos P70 million o labi sa 1,200% poon 2008 hasta 2024.
Sa hearing kan House Committee on Justice sa ika-apat na reklamo sa impeachment laban sa Bise Presidente, sinabi ni Ridon na base sa Statement of Assets, Liabilities, and Net Worth (SALN), P18.49 million an net worth ni Duterte kan 2008 asin P18 million kan 2009.
Kan 2023, uminabot na ini sa P77.5 milyon asin P88.5 milyon kan 2024. Sinabi ni Ridon na pwedeng ikonsiderar ining “unexplained wealth,” na saro sa mga isyung pinalataw sa reklamo sa impeachment. Alagad, nanindugan an nagkapirang mambabatas na kaipuhan an mas konkretong ebidensya arog kan detalye kan bank accounts.
An Justice Committee Chairman, si Rep. Gerville ‘Jinky Bitrics’ Luistro, sa ibong na lado, nagsabi na dai kaipuhan na ihayag an siring na mga detalye sa yugtong ini kan proseso asin na ini puedeng pag-olayan kun an kaso mag-abante sa Senado bilang sarong korte nin impeachment.
I-inagid man ni Ridon an reklamo sa kaso ni dating Supreme Court Justice Renato Corona kun saen nagluwas an mga ebidensya sa mismong pagbista kan Senado.
