Nagpakol na sa P3.40 billion an kantidad kan danyos sa sektor kan agrikultura huli sa bagyong Kristine.
Sa datos kan Department of Agriculture Regional Field Offices kan nakalihis na Martes, Oktubre 29, an mga naapektarang agricultural goods iyo an paroy, high value crops siring man an agricultural infrastructure.
Igwa ining katampad na 174,087 metrikong tonelada an production loss.
Orog na naapektaram an paroy na nasa 94.5% mantang sa iba pang naapektarang pananom siring kan high value crops na nasa 4.23%, sa maisan 1.14% asin sa siraan nasa 0.13%.Kadakol sa mga naapektarang paroy nairehistro sa Bicol region, na igwang P3.10 billion production loss asin haros 4 sa 10 ektarya kan apektadong paroy an orog na naapektaran.
Mientrastanto, sa damage assessment sa livestock asin poultry, nasa 3,009 an nadanyaran sa panlalamasa kan bagyo na nagkakantidad nin P4.35 million na kun saen mahihiling na mas kadakol sa Ilocos region asin Soccsksargen.
Sa mga siraan man nasa P11,20 million an naikurit na danyos kaibahan na digde an mga sirang tilapia, bangus, hipon asin alimango na mayoryang nairecord sa Central Luzon.
Sa mga irigasyon, dam asin farm structure, nakapagrehistro nin P69.36 million na kantidad kan danyos.Nasa kabilugang 79,904 na paraoma sa 11 rehiyon an naapektaran sa panlalamasa kan bagyo.
Komo tabang, nagtao an DA sa mga paraoma nin P541.02 million na kantidad kan agricultural inputs siring kan rice, corn, vegetable seeds asin medicine para sa livestock asin poultry.
Nagtao na man an NFA nin 1,477 bags nin bagas sa mga lokal na gobierno sa Ilocos asin Bicol regions. Nagtagama na man nin P1 billion na quick response fund para sa rehabilitation kan mga apektadong lugar.
