NAGA CITY- Pigsaysay kan alkalde kan siyudad nin Naga na posibleng mag-atender si Presidente Ferdinand Bongbong Marcos sa Peñafrancia Fiesta sa masunod na taon.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na preparado na soboot an surat na ipapadara sa Presidente alagad huli ta sibot an lider kan nasyon sa maanomalyang flood control project bako ini an tamang oras para sa nasambitan ng katuyuhan.
Sigun ki Robredo, dakulang bagay na nabibisita kan Presidente an sarong lugar huli ta personal man kaining nahihiling an kamugtakan asin ma-a-assess kun ano pa an kaipuhan.
Dugang pa kan alkalde, mas marhay na sa sunod na taon na sana magbisita sa Naga City si President Marcos nin huli ta kadakol pang pigpapakarhay sa siyudad.
Piglinaw man kan opisyal na makalihis an eleksyon mayo na dapat kalaban sa politika asin kaipuhan na galangon an opisina kan Presidente.
Sa katotoohan, antes pa ini magtukaw komo alkalde kan Naga, nagsurat naman si Robredo sa Presidente dapit sa mga pigrereklamo o mga problema na manunutaran sa siyudad.
Mientrastanto, padagos man an pagsusog kan LGU-Naga sa paagi kan CSWDO sa mga nagpamalo-malo na namamalimos alagad igwang maraot na katuyuhan sa iba partikular sa kasagsagan kan mga aktibidad na pigkukundusir kasabay kan Peñafrancia Fiesta.
Sa ngunyan, kahagadan na sana ni Robredo sa publiko na padagos na sumunod sa mga pandundunan na piglatag kan mga otoridad para sa mas salbadong pagselebar kan nasambitan ng okasyon.
