Suportado ni Senador Alan Peter Cayetano an propwesto na mapalawig an paagi nin pagboto kan mga Overseas Filipino Workers (OFWs) asin iba pang mga Pilipino sa ibang nasyon sa paagi kan electronic asin postal voting.
Kasunod ini kan pagpublikar kan Senate Committee Report No. 369, na isinangat kan mga Komite kan Senado sa mga Reporma sa Eleksyon; asin Finance asin sponsor na si Senador Imee Marcos.
Katuyuhan kan proposal na ini na amyendahan an Overseas Absentee Voting Act tanganing masimbagan an mga hamon na inaatubang kan mga Pilipino na botante sa ibang nasyon asin malikayan an saindang disenfranchisement.
Sinabi man kan senador na dakula an maitatabang kan mga OFW sa 2023 na may total na $33.5 billion na remittances — katampad kan 8.5% kan GDP kan nasyon.
Pigtawan duon ni Cayetano na an nasambitan ng prosopwesto susog sa Artikulo II, Seksyon 5 kan Konstitusyon kan Pilipinas na naghahagad nin seguradong sistema para sa absentee voting para sa mga Pilipino sa nasa ibang nasyon.
An prosopuesto nagmamawot na magkaigwa nin elektronikong pagboto gamit an mga ligtas na online platform siring man an pagboto sa koreo para sa mga limitado an access sa internet.
Katuyuhan man kaini na magkaigwa nin sistema para sa mga seafarers kun saen pwede sindang magboto online na dae na maluwas sa barko.
Tanganing masierto an seguridad asin madaling paggamit kan mga bagong paagi nin pagboto, an Commission on Elections (COMELEC) pigtatawan nin trabaho na magbugtak nin mga panundon tanganing maprotehiran an datos kan mga botante asin maseguro an madaling paggamit kan mga Pilipino sa ibang nasyon.
