NAGA CITY – Tinawan importansya kan kapitan kan Pacol, Naga City an pagtatanom nin puon nin kahoy asin an dae basang na pagputol kan mga ini.
Sa entrevista kan Bombo Radyo Naga ki Ruben Limbo, kapitan kan nasambitan ng lugar, sinaysay kaini na napaka importante kan pagtatanom nin kahoy huli ta nakakatabang ini tanganing maprotehiran an mga residentes kontra sa manlaen-laeng kalamidad.
Ipinagpapasalamat man kan opisyal an mayong untok na suporta kan saiyang mga ka barangay sa mga pigkokondusir na mga tree planting activity sa saindang lugar.
Alagad, tinawan duon man kaini na dae porke nagtanom nin puon kan kahoy tutugutan na an basang na pagputol kan mga ini.
Ini huli ta an bagong tanom na kahoy an dae man tolos matalubo asin madakula.
Kun kaya, antes na magputol nin kahoy pigsisierto muna ninda na pupwede na ining putulon asin dae man ini makakadanyar sa mga residentes asin sa kapalibutan.
Pig-eksplikar man kan kapitan, na pigpapaputol talaga ninda an mga puno kan kahoy na posibleng makadanyar sa mga kaharungan magin sa mga residentes orog na sa oras kan kalamidad.
Katakod kaini, padagos man na pig-eenkaminar kan opisyal an publiko na makisumaro man sa mga pigkokondusir na mga tree planting activities.
