NAGA CITY- Dae uyon an pamilya kan sarong Overseas Filipino Worker (OFW) na nagta-trabaho sa Kuwait na makasabay sa repatriation an gabos na Pinoy na nagta-trabaho sa nasambitan na nasyun.
Sa pakikipag-olay kan Bombo Radyo Naga ki Elvie Odiamar, saro sa mga kaparientes kan OFW na si Gigi Roldan na nasa Kuwait, sinaysay kaini na magayon an trabaho kan saindang kaparientes asin maboot man an nagin amo kaini.
Sa haros 11 taon suboot kaining pagtitinir sa nasambitan nang lugar, mayo man ining naeksperyensyahang ano man na problema kun kaya nagtitinir pa ini sa saiyang trabaho.
Segun pa ki Odiamar, maapektaran an saindang pagbuhay kun en kaso magpuli na si Roldan huli ta pigpapaklase kaini an saiyang mga aki.
Klinaro ni Odiamar na dae man siya kontra sa nasambitan na kasuguan alagad dapat suboot na ipautob sana ini sa mga Pinoy na nakakaeksperyensya nin problema asin pangma-maltrato kan saindang mga employer o amo.
