Ikinahadit kan Pamilyang Duterte an soboot mapagkakatiwalaang impormasyon na si dating Presidente Rodrigo Duterte an nanutarang mayong pagmangno sa saiyang kwarto sa laog kan pasilidad kan International Criminal Court (ICC).
Sa sarong pahayag, sinabi ni VP Sara Duterte na dae soboot inabisuhan an saindang pamilya sa insidente, kun saen nagsairarom sa nagkapirang laboratory tests an dating Presidente.
Ibinunyag man ni VP Sara na dae soboot tulos naasikaso kan ICC an simpleng problema kan saiyang ama na sarong ingrown toenail asin padagos mang pigbabalewala an malinaw na pangangaipuhan kan tagapag-ataman sa gilid kaini.
Pigtutukoy kaini an isinagibong welfare check kan mga opisyal kan Embahada kan Pilipinas sa The Hague, Netherlands, na sigun sa Department of Foreign Affairs (DFA), an parte kan tungkulin kan embahada sa mga nakakulong na Pilipino sa ibang nasyon.
Hurot ni VP Sara, mayong ibang rason an padagos na pagkakakulong kan saiyang ama kundi an “pasakitan ini huli sa reklao kan sarong dating senador na nawaran nin dangal”.
Sa suhay na pahayag na iniluwas man kasuodma, sinabi kan DFA na mayo ining impormasyon dapit sa naireport na insidente sa dating presidente.
Sigun sa tagapagtaram kan ICC kan nakalihis na Setyembre 24, na binanggit kan DFA, isinagibo an pagbisita alinsunod sa Rome Statute kan ICC asin iba pang kaukulang panundonan, kasunod kan mga internasyonal na pamanyatan para sa mga nakakulong na indibidwal na igwang karapatan na mahiling kan representantes kan saindang nasyon.
Dugang pa kan ICC, an siring na mga pagbisita an pigsasagibo sana sa pagtugot o sa kahagadan kan tawong nakakulong.
Pighurot man kan DFA na an pagbisita an ginibo kan mga opisyal na embahada sa sarong propesyonal, bakong mapanghimasok asin igwang paggalang na paagi, asin bako kan iba pang pigsasabing ahente kan gobyerno siring kan mga paratang kan Bise Presidente.
