Haloy nang naghihingowa si Presidente Marcos Jr. tanganing pakarhayon asin linigon an mga problemang winalat kan nakalihis na administrasyon.
Kasimbagan ini ni Palace Press Officer USec. Claire Castro sa pangapodan kan United People’s Initiative na nangangapodan ki Presidente Marcos na maggibo nin lakdang tanganing maibweltada an kumpiyansa kan publiko kasunod kan kontrobersiya sa flood control projects.
Sinaysay ni Castro na dae paglingawan kan publiko na si Presidente Marcos an nagpuon kan hararom na imbestigasyon tanganing ipahiling sa taumbayan na kasaro ini sa laban kontra sa korapsiyon.
Pigtawan-duon ni USec. Castro na an mga pagmamawot na mapatalsik sa pwesto an Presidente iyo an mga indibidwal asin grupo na pwedeng naapektaran o pigtatamaan kan mga imbestigasyong ini.
Sa ngunyan, padikit-dikit nang nagluluwas an mga ebidensiya, kaya dae soboot pagpabayaan liwat na padiklomon an sitwasyon kan mga grupomg nagpoporbar na pugolan an pagpapanimbag sa mga may sala.
Punto ni Castro na kun nagbago an liderato, posibleng dae na maipagpadagos an mga imbestigasyon asin matawan nin tyansang makasalbar an mga tiwali.
