Nahihiling ngunyan kan Philippine Coast Guard (PCG) an posibilidad na magamit kan China an insidente kan banggaan sa Bajo de Masinloc komo pangsuporta sa saindang argumento na sinda an igwang sovereign rights sa teritoryo kan nasyon na nasa parte kan katubigan kan West Philippine Sea.
Sigun ki PCG Spokesperson for the West Philippine Sea Commodore Jay Tarriela, matibay an China sa pagluluwas kan saindang sadiring bersyon kan istorya asin magin sa pagbabaliktad kan mga katotoohan kaya man piglalaoman na sa mga masunod na aldaw magkakaigwa na nin pahayag an China dapit sa insidente.
Basado man soboot sa mga nakahilis na pahayag kan China, matibay man an nasambitan ng nasyon mambasol sa ibang nasyon imbes na basulon an saindang sadiri.
Hurot man ni Tarriela, pinakamakusog na panlaban asin pangontra ninda ngunyan sa mga argumento kan China iyo an pagheras kan katotoohan na suportado kan mga videos asin ladawan sa publiko kan mga totoong pangyayari tanganing malikayan an pagpapalakop kan mga salang impormasyon mapadapit sa paglaban kan Pilipinas sa mga iligal na presensiya kan Chinese Coast Guards.
Sa ibong kan pambabaliktad kan nasambitan ng nasyon komo taktika, nanindugan si Tarriela na mayo nin makakadaog pa sa mga katotoohang saindang pigluwas na nagpapahiling kan saindang pagtindog kontra sa mga illegal asin dangerous maneuvers kan mga barko kan China.
Mientrastanto, sa ibong man kan insidente, nagtitinir an PCG vessel sa Bajo de Masinloc tanganing magpaabot kan saindang ayuda sa mga parasira siring kan fuel subsidy asin yelo para man sa padagos na operasyon kan lokal na parasira sa nasambitan ng katubigan.
Pigsierto man kan PCG na padagos nindang babantayan an kasalbaduhan asin seguridad kan mga parasira tanganing salbadong makapag-hanapbuhay sa laog kan territorial waters kan Pilipinas.
