Biniberipika sa ngonian, kan Armed Forces of the Philippines (AFP) an mga report dapit sa sarong Pinoy na nagadan suboot mantang nakikipaglaban kaiba an pwersa kan Russia sa nagpapadagos na giyera sa Ukraine.
Segun sa tagapagtaram kan AFP na si Col. Francel Margareth Padilla, dae pa opisyal na pigkukumpirmar kan militar an pagkakakilanlan kan Pinoy fighter, siring man an eksaktong sirkumstansya sa likod kan insidente.
Tinawang-duon kaini na amay pa para sa AFP na magpaluwas nin definitive statement huli ta padagos pa an proseso kan imbestigasyon asin validation.
An pahayag ipinaluwas kan Armed Forces of the Philippines (AFP) kasunod kan report gikan sa sarong independienteng ahensya nin bareta kan Ukraine. Susog sa ahensya nin paniktik kan Kyiv, sarong 37-anyos na Pilipino gikan sa Metro Manila an nagadan sa Donetsk Region mantang nakikipaglaban para sa militar kan Russia.
Base sa impormasyon na natipon kan Ukrainian Defense Intelligence, an parapakilaban nakakua nin visa sa Russia kan Enero 2026 asin nagbyahe pasiring sa Russia kan Abril. Nagpirma suboot ini nin kontrata sa Armed Forces kan Russia kan Mayo 3.
Pakalihis nin sarong semana nin pagsasanay sa militar, an Pilipino tulos na ipinadara sa enotan, kun saen siya nagadan kan huring kabtang kan Mayo sa sarong pag-atake harani sa Katerynivka sa rehiyon nin Donetsk.
Enot nang nagpatanid an Department of Foreign Affairs (DFA) sa mga Pilipino kontra sa pagpartisipar sa mga armadong iriwal sa ibang nasyon o mag-akto bilang “mercenary” bayad na sundalo sa ibang nasyon.
