NAGA CITY – Naidistrebwer na kan Public Safety Office Naga sa saindang mga personahes an mga gadgets na gagamiton kan saindang lado sa pagdakop kan mga violators.
Sa nagin paghampang sa mga kagawad kan media ni Renne Gumba, pamayo kan PSO-Naga, sinaysay kaini na enkaso an nasambitan ng gadget an piggamit sa sarong violator an record kaini an didiretso na sa database kan Land Transportation Office (LTO) na makakaapektar man sa validity kan saindang lisensya.
Enkaso na pauru-utrong madakop sa syudad posibleng gikan sa sampulong taon na validity kan lisensya an magbaba na sana sa limang taon o dagusan na ining i-revoked.
Katakod kaini sulamenteng resibo na sana siring kan bill sa kuryente an mareresibe kan mga violators kun sain yaon naman duman an saindang nagin violation asin an kantidad kan saindang babayaran.
Pakiulay man ni Gumba sa mga posibleng matawan nin ticket na tolos ining picturan huli ta pirang aldaw sana an magpapara na ini.
Maogma man na pigheras kan opisyal na sa luwas kan Metro Manila sulamenteng an syudad pa sana nin Naga an primerong nagsasagibo kan nasambitan ng interconnectivity project.
Sa presente igwa na sinda nin 65 na existing na gadgets na magagamit sa saindang mga operasyon, mantang nasa 20 mga gadgets man an gamit sa field testing kan mga ini.
Apwera pa digdi, pupwede man na bayadan an mga ini sa paagi kan e-wallet sa paagi kan pag scan sa bar codes o QR codes o kaya naman magbayad sa treasurers office.
Sa ngunyan, pagirumdom na sana kan opisyal sa gabos na mga motorista asin drivers na magin extra conscious sa pagpresentar kan saindang mga papeles asin pagsunod sa mga panundunan tanganing malikayan an pagkakaigwa nin mga violation.
