Nakolekta an sangkaterbang mga ilegal na campaign materials sa pagpupuon kan campaign period kasabay kan pagkasa kan ‘Operation Baklas’ sa bilog na nasyon.
Sigun sa Commission on Elections (COMELEC), an mga nakuang mga posters an saindang itatago asin ia-account tanganing magamit komo ebidensiya kun sakali na igwang mga kandidato an nagmamatagas na pauro-utro na pigpapaskil pa man ini sa mga dae common poster areas.
Sa presente, padagos an paglilibot kan mga local COMELEC sa manlaen-laen na parte kan nasyon tanganing halion an mga illegally posted na mga campaign materials na nasa mga poste kan kuryente o dae kaya na sa kahoy pa.
Sigun ki Commission on Elections (COMELEC) Chairman George Erwin Garcia, tolong aldaw sana an itatao ninda sa mga kandidato tanganing halion an mga ini huli ta kun dae ini masunod, sinda na mismo an mahali asin pwede pang maghampang sa kasong kriminal an mga kandidatong dae masunod digde.
Pigpaliwanag man ni COMELEC Chairman Garcia na pwede kaining i-presume an mga kandidato na sinda pa man an mga nagbugktak kan mga ini maski na sabihon pa nindang kalaban an nagkabit o dae kaya mga supporter, soboot an mga kandidato na sana an magpaliwanag para digde.
Dugang pa kaini a kun ini kaya an saindang papabayaan sana, pauro-utro na magigin rason ini kan mga kandidatong madadakop sa siring na aktibidad.
Katakod kaini, pigsierto man kan opisyal na mayo sindang papalampason sa ‘Operation Baklas’.
Gabos kan mabalgar an matatawan nin karampatang aksiyon.. Pig-enkaminar pa kaini an mga lokal na kandidato na sana sa paglaog kan saindang campaign period sa Marso 28 an likayan na kaini an mga siring na ilegal na campaign materials tanganing dae na man mabaklas asin masayang an saindang mga gastos.
Pig-enkaminar man ni COMELEC Chairman Garcia na publiko na enkaso igwang maapektaran na siring, pwede ining kuanan nin litrato o videohan asin ipadara sa saindang opisina.
Pigsierto kaini na magpapadara tulos sinda sa area nin mga local COMELEC tanganing baklason ini.
