NAGA CITY-Gadan an sarong lalaki makalihis ining makuryente sa sadiri kaining harong sa Mauban, Quezon.
Binisto an biktima na si Bernardo Blastique Tejada, 61 anyos, reisdente kan Brgy. Mabato, Mauban kan nasambitang probinsya.
Sa nagunong impormasyon kan Bombo Radyo Naga sa Quezon Police Provincial Office, nakakua soboot nin apod an Mauban Municipal Police Station alas-11 nin aga kasuugma, Mayo 13, nin apod gikan sa tugang kan biktima na nakuryente ini.
Tulos man na pigtao kan nasambitang istasyon an impormasyon sa MDRRMO personnel kan Mauban asin nagresponde man sa lugar.
Basado sa inisyal na imbestigasyon kan mga awtoridad, bandang alas-8 nin aga kan nag-uli soboot an biktima asin naglaog sa kwarto kaini kan nakadangog an tugang kaining si Rueben Blastique Tejada nin ribok gikan sa kwarto kan biktima na pighunaan kaini na may pighihirahay sana si Bernardo.
Bandang alas-10 man soboot nin aga kan nagdara an amiga kan biktima nin pagkakan para igdi asin nahiling ini na nakahigda sa saiyang kama.
Sa imbestigasyon kan mga kapulisan nagluwas na an pagbukas sa bulb sa kwarto kan biktima pigsasagibo sa paagi nin pag-ikot kaini clockwise asin counter-clockwise.
Pigdara man kan Mauban MDRRMO an biktima sa sarong ospital alagad pigdeklarar man sana ini igdi na mayo na nin buhay.
Mayo man nin nanotaran na foul play sa pigkondusir igdi na eksaminasyon.
