NAGA CITY – Arestado an sarong menor de edad sa pigsagibong buy-bust operation kan mga otoridad sa siyudad nin Naga.
Binisto an suspek na sarong 17-anyos na lalaki asin residente kan Zone 5, Brgy. Balatas, sa nasambitan ng siyudad.
Sa entrevista kan Bombo Radyo Naga ki PSSG Roberto Aguillon, Assistant PIO kan Naga City Police Office (NCPO), sinaysay kaini na subject for drug test pa an suspek asin enkaso na magpositibo ini, mdudugangan pa an saiyang kaso orog na sa pagbalgar sa RA 9165.
Dugang pa kaini, enkaso man mapatotoohan na kan DSWD na aram na kan suspek an saiyang pigsagibo, mapadagos pa an proseso kan kaso.
Mientrastanto, sa inisyal na imbestigasyon kan mga otoridad, nakumpiskar sa suspek an 7 pidaso kan plastic sachets na naglalaog kan pinagtutubodang marijuana leaves, kaibahan an P500 komo buy-bust money.
Katakod kaini, liwat nangapodan an opisyal orog na sa mga magurang na bantayan an saindang mga aki, aramon kun isay an mga nakakaribahan kaini asin kun saen nagduduman tanganing malikayan na maembwelto sa siring na ilegal na aktibidad.
