NAGA CITY- Masalimuot an sitwasyon sa presente sa Estado Unidos huli sa mahewasang protesta na pigkukundusir sa lugar kontra sa immigration policies ni US President Donald Trump.
Sa report ni Bombo International News Correspondent Virginia Contreras, gikan sa California, USA, sinaysay kaini na bakong marhay para sa mga minority sa Estados Unidos an sitwasyon orog na ta mas nagin mahigot asin dae na makatwiran an pigpapautob na panundon ni Trum kontra sa mga illegal na migrante sa lugar.
Sigun ki Contreras, tolos na pigdadakop kan mga otoridad an mga suspected immigrants, ide-detain asin ipo-proseso.
An lakdang na ini an pinagtutulan kan mga residentes sa America nin huli ta maski US citizen pwede makulong.
Marurumduman mas orog pang naghewas an mga pigsasagibong hiro-protesta sa bilog na Estados Unidos partikular sa mga mayor na siyudad siring kan New York, Washington DC, Los Angeles, San Franciso asin iba pa komo pagtutol sa lakdang na ini kan gobierno ni Trump.
Mientrastanto, kasabay kan pangyayari dae soboot malikayan kan mga Pilipino na dae matakot alagad sa ibong kan pagkahadit, alinlangan, padagos man sinda sa pakikipagsapalaran siringman pagta-trabaho sa USA.
Pigsaysay pa ni Contreras na preparado ining magbali sa alsa-masa kun kaipuhan nang maray tanganing maipaabot an saindang mga agrangay.
Sa ngunyan, kamawotan na sana kaini na mauntok na an kariribukan asin agihon sa tamang proseso an pagpapautob kan mga panundon tanganing liwat na makabweltada an gabos sa normal na pagbuhay.
