Ipigreport kan sarong opisyal kan Estados Unidos na may progreso sa pag-ulay kan Iran asin Oman na puwedeng liwat na magbukas kan Strait of Hormuz, sarong mahalagang agihan kan mga barko kan langis sa bilog na kinaban, asin maibalik an normal na pagluwas kan langis na naapektuhan kan limang-bulan na giyera kan US asin Iran.
Sigun sa opisyal, inaasahan kan Washington na magkakaigwa nin kasunduan an duwang nasyon, na nasa magkasalungat na lado kan kipot, tanganing maibalik an normal na pag-agi kan mga oil tanker.
Sinabi man kaini na kun maipapahayag na an kasunduan para sa malayang paglayag kan mga komersyal na barko,hahalion kan US an blockade sa mga pantalan kan Iran alagad nakadepende pa man ini sa pag-utob kan Iran sa mga napagkasunduan.
Antes magpoon an giyera kan Pebrero 28, kinakarkulong sarong bariles sa kada limang bariles nin langis sa bilog na kinaban an nag-aagi sa Strait of Hormuz.
Dahil sa labanan, naningil an Iran nin toll sa mga tanker asin inatake an ibang mga barko na nag-aagi na mayo nin permiso. Nagresulta ini sa pagtaas kan presyo kan enerhiya asin inflation.
Kasabay kaini, nagpirma an Saudi Arabia, Pakistan, asin Turkey sa sarong joint defense agreement sa Mecca tanganing pakusugon an saindang pagtatarabangan sa depensa.
Sigun sa tolong nasyon, kinukunsiderar ninda na pag-atake sa gabos an ano man na armadong pag-atake laban sa sarong miyembro kan grupo.Mientrastanto, , padagos man an pagsisikap kan US na mapauntok an labanan sa pag-ultanan kan Israel asin Hezbollah sa katimugang Lebanon.
Sa sarong interview, ipinagtanggol ni Iranian President Masoud Pezeshkian an pakikipag-ulay sa US. Sinabi kaini na kadakol na haralangkaw na opisyal militar kan Iran an nagsusuporta sa negosasyon tanganing dagusan ng matapos an giyera.
