Nagbuwelta si Vice President Sara Duterte sa nagin hamon kan Malacañang na dapat ining magpaliwanag sa taumbayan kun official visit an saiyang mga biyahe sa ibang nasyon.
Sa sarong press conference sa Davao City, dae napugulan kan Bise Presidente na liwat apudon na stupid asin maluya an administrasyon.
Napahangos hararom na sana an Bise Presidente kan mahapot sa nasambitan ng isyu. Ipinaliwanag kan Bise presidente na bakong official business an saiyang pagbiyahe sa ibang nasyon.
Kun ginamit an kwarta kan bayan para sa sarong official business, duman kinakaipuhang mag-report kan saiyang ginastos alagad kun personal trip man asin mayong ginamit na kwarta kan gobyerno an dae na kinakaipuhang magsumiter nin report.
Marurumduman kan nakalihis na Huwebes, hinamon kan Malacañang an Bise Presidente na ireport an resulta kan saiyang mga biyahe sa luwas kan nasyon sa taumbayan.
Kan nakalihis na semana man, kinuwestyon ni Palace Press Officer USec. Claire Castro an overseas trips ni VP Sara kun ini an personal o para sa nasyon na nagresulta man para sa Bise Presidente na apudon na “b*b*”.
Bumuwelta man an Palace official asin pig apod na emosyonal an Bise Presidente asin sinabing kun halangkaw an emosyon, maluya man an kukuti.
An pag-kuwestiyon man sa mga biyahe kan Bise Presidente sa ibang nasyon an sa tahaw kan mga espekulasyon na ini an may kinaraman sa interim release bid kan saiyang ama na si dating Presidente Rodrigo Duterte sa sarong bakong pinangaranang nasyon.
Kun marurumduman nagpasiring sa The Netherlands si VP Sara kan nakalihis na Mayo 29 hasta Mayo 31 tangani iselebrar an saiyang kumplianyo kaiba an saiyang ama na si dating Presidente Duterte na nakadetine duman.
Nagpasiring man an Bise President sa Qatar asin Kuala Lumpur Malaysia asin sa Melbourne, Australia tangani mag atendir sa sarong pagtitipon duman.
