NAGA CITY- Nagbungkaras an kasulo sa may parte kan Villa Robredo Compound Barangay Sabang, Naga City ngunyan na aldaw.
Sigun ki Richeme Paligar, aki kan nasuluan, tolos soboot sindang naghagad nin tabang kan mahiling na igwang a-so.
Dugang pa kaini, marekas an paglakop kan kalayo kun kaya labi man an saindang pagkahadit na namatean orog na ta taraid an harong sa nasambitan ng lugar.
Katakod digde, tolos man na nagresponde an BFP Naga kaibahan an iba pang mga fire volunteers tanganing tolos na matumtom an kalayo asin dae na orog pang maglakop.
Mientrastanto, pigsaysay ni Paligar na mayo man nagluluto sa saindang harong kan magbungkaras an kalayo.
Apwera digde, nakasarado man an mga appliances kun kaya posible soboot na gikan sa kataid na boarding house an ginikanan kan kasulo.
Sa ngunyan, padagos an imbestigasyon sa rason kan insidente siringman an pag-aram sa danyos na winalat kaini.
