Pinapabaliktad kan panel of prosecutors kan Department of Justice (DOJ) sa Muntinlupa City Regional Trial Court (RTC) Branch 204 an pag-abswelto kaini sa mga kaso ni dating Senator asin presenteng Mamamayang Liberal (ML) party-list Rep. Leila de Lima na may kinaraman sa iligal na droga.
Sa pigsunad na motion for reconsideration kan prosecutors sa pangengenot ni Provincial Prosecutor Ramoncito Bienvenido Ocampo, nakabugtak na dae bastante an pagbawi kan testimoniya kan witness na si dating BuCor OIC Rafael Ragos tangani ipawarang bisa an saiyang orihinal na testimoniya.
Sigun sa prosecutors, paglapastangan ini sa criminal justice system.
Marurumduman, kan nakalihis na Hunyo 25 pinagtibay kan korte an desisyon kaini tangani iabswelto si de Lima kasunod kan pagbalik kan Court of Appeals sa kaso kan nakalihis na Abril 30.
Nanindugan si Presiding Judge Abraham Joseph Alcantara sa saiyang posisyon na pag-abswelto sa drug cases ni de Lima.
Alagad hurot kan DOJ prosecutors dae soboot nagsunod si Judge Alcantara sa direktiba kan CA asin dae ikinonsidera an gabat kan pagbawi ni Ragos sa saiyang testimoniya.
Apwera pa ki Ragos, may iba pang mga testigo na mapatotoo sa akusasyon kontra ki de Lima na isinasangkot sa kalakalan kan iligal na droga sa New Bilibid Prison (NBP).
Mientrastanto, dae man napugulan ni de Lima na magpahayag nin pagkaanggot sa panibagong lakdang kan prosecutors katakod sa ikinakabit na drug cases sa saiya.
Kinuwestyon kan lehislador an garu pagpataw sa saiya nin triple jeopardy o pagusig/pagpadusa sa saiya nin kadakol na beses sa parehong kaso, makalihis an haros 7 taon na bakong makatarungang pagkakakarsel.
