Ipinadara na kan gobyerno an sarong grupo kan police officers sa Cambodia tanganing hanapon an puganteng gambling tycoon na si Atong Ang, sigun ki Interior Secretary Jonvic Remulla.
Sigun sa sekretaryo, posibleng magtakas si Ang pasiring sa Cambodia o Thailand tanganing likayan an pag-arestar dapit kan mga kasong kidnapping na igwang koneksiyon kan 34 na sabungero, maski pighurot kan Bureau of Immigration na mayo ining record kan paghali nin nasyon.
Sinaysay kan sekretaryo na pigsusuri kan pulisya an gabos kan posibilidad asin nakikipag-koordinar na sa mga otoridad sa Cambodia tanganing aramon an posibleng kinamumugtakan ni Ang.
Inako kaining mayo pang nareresebir na intelligence report, alagad nagtutubod ining igwang bastante na kwarta si Ang, na pigkakarkulong P10 bilyon na pwedeng gamiton kaini tanganing makalikay sa mga otoridad.
Sa laog kan nakalihis na duwang semana, nagsagibo na an kapulisan nin raid na dae mababa sa 18 lokasyon sa manlaen-laen na parte kan nasyon tanganing hanapon si Ang, alagad dae pa man giraray ini nanutaran.
Nakaresebir na man an CIDG-NCR nin 40 tip gikan sa mga impormente, kadaklan nagtutukdo sa Metro Manila, Central Luzon, CALABARZON asin Bicol Region, alagad dae pa gabos beripikado.
Naenot nang nagluwas nin warrant of arrest kontra ki Ang an mga korte sa Laguna asin Batangas, alagad pighurot kan kampo ni Ang na ini an premature. Mientrastanto, nasa kustodiya na kan gobyerno an gabos kan 21 kapwa-akusado ni Ang.
