NAGA CITY- Nagseserbeng dugang na pwersa o katabang kan Philippine Army an mga active reservist kan nasyon tuyong igwang nagbubungkaras na kalamidad.
Sa nagin paghampang sa mga kagawad kan media ni LT. COL Josephus Emar Rempillo, Director kan 502nd Community Defense Center Camarines Sur, sinaysay kaini na malalaoman an mga active reservist pag-abot sa mga humanitarian assistance orog na kun igwang magtamang sakuna.
Sigun sa opisyal, sarong patotoo soboot digde an panlalamasa kan bagyong Uwan sa Rehiyong Bicol kun saen antes pa man an pagtama kan bagyo, nakipag-koordinar na sinda sa mga ahensiya kan gobierno sa manlaen-laen na siyudad asin Municipalidad sa probinsiya kan Camarines Sur.
Nakapag-deploy nin mga reservist sa probinsiya kan Camarines Sur asin nagtabang sa mga force evacuation sa manlaen-laen na areas. Apwera digde, yaon man an mga ini sa pigkundusir na relief operations sa may parte kan Goa, Libmanan, San Jose, Naga asin Pili.
Siringman, yaon sinda sa pigkundusir na road clearing operations na ginibo makalihis an panlalamasa kan bagyong Uwan partikular sa banwaan nin Libmanan na kun saen igwang haros nasa 30 aktibong reservists.
Mientrastanto, sa bilog na probinsiya kan Camarines Sur igwa soboot kabilugang poco mas o menos 360 na active reservists na nagseserbeng expansion kan AFP asin dugang pwersa kun kaipuhanon kan nasyon sa panahon kan kariribukan.
Apwera sa humanitarian assistance nagtatabang man an mga reservists sa iba pang aktibidad siring kan blood letting asin socio economic activity.
Sa ngunyan, pigsierto na sana ni Rempillo na anumang oras preparado an saindang lado na magtaong asistensiya sa mga tawo huli ta parte man ini kan saindang responsabilidad sa komunidad.
