Aram baya nindo mga ka-bombo, an Kansai International Airport nagrereseber nin milyon-milyon na tawo kada taon alagad igwa sindang sistema na nagsisierto na mayong bagahe an mawawara.
Susog sa mga report, sarong dakulang problema enkaso mawaran nin bagahe an sarong palupadan siring na sana sa US kun saen basado sa data na gikan sa Bureau of Transportation Statistics an domestic flights nawawaran nin nasa 3 million bags kada taon.
Huli sa milyones na bag kan kada indibidwal an dapat na proteheran an ibang airport dae nalilikayan na mawaran nin bagahe
Katakod kaini, an Kansai International Airport na pigseserbehan an siyudad kan Osaka nagbukas kan September 1994 tanganing mabawasan an suruksukan sa Osaka International Airport an nagseserbe sa milyon na mga pasahero kada taon.
An mga staff kan Kansai Airport dakulang orgulyo na sinda an episyente sa pagkapot kan mga bagahe kan saindang mga pasahero na nagresulta tanganing dae mawaran nin bagahe an saindang palupadan.
An nasambitan ng palupadan an pigmirar komo seventh busiest airport alagad igwa sindang well-set-up na system na kun saen an mga bagahe kan saindang pasahero piglilikayan na maraot asin marekas na mabibilang.
An mga empleyado, consistent sa pag-check sa numero kan mga bags na nag-aabot na kun saen sainda ining pigkukumprar sa naghahali. Tolos na pighahanap an mga item sa cargo hold kan eroplano o sa screening room. An obheto an bako sanang siertuhon na mayong bagahe an mawawara kundi mai-deliver an items sa baggage claim sa laog kan 15 minutos sa pag-abot kan eroplano.
Sa ngunyan, an Kansai International Airport an walong beses nang nakareseber nin international award para sa best baggage delivery para sa mga palupadan sa bilog na kinaban.
