NAGA CITY- Pigtintaan ni Naga City Mayor Leni G. Robredo an Executive Order No. 026, na pig-issue kan August 5 kan presenteng taon na nagmamandato sa pagkriar kan technical working group (TWG).
An nasambitan ng technical working group an mamanehar sa pagtatao nin medical allowance para sa mga emplyado kan City Hall.
An deriktiba na ini an nakaangkla sa Section 7 kan Presidential Executive Order No. 64, series of 2024, na kun saen pig-ootorisa an pagtatao nin subsidiya na nagkakantedad sa P7,000 para sa medical allowance kada taon kan mga kwalipikadong government civilian personnel.
Sigun sa kasuguan kan alkalde, an subdisya an itatao sa pagpuon kan Fiscal Year 2025.
An komprehensibong guidelines, rules, asin regulations para sa nasambitan ng pananao kan subsidiya an nakapalaman sa Department of Budget and Management (DBM) Budget Circular No. 2024-6.
Katakod digde, an technical working group iyo man an nasugo na siertuhon an marhay asin episyenteng implementasyon sa kasuguan kan Alkalde kan siyudad nin Naga.
