NAGA CITY – Pigdistrebwer kan Bureau of Fisheries and Aquatic Resources (BFAR)-Bicol an 90,000 na mga fingerlings sa Goa Fisherfolk and Farmers Association (GoFFA).
Sa entrevista kan Bombo Radyo Naga ki Wheng Briones, tagapagtaram kan Bureau of Fisheries and Aquatic Resources-Bicol, pigkondusir an distribusyon kan nasambitan ng mga fingerlings sa Goa sa paagi kan lokal na gobyerno kan banwaan ini sa irarom kan SAAD Program.
Nagpanao man an mga ini nin 90,000 na fingerlings sa irarom kan phase 2 kan nasambitang programa, partikularmente kan Tilapia technodemo project, kun saen an Goa Fisherfolk and Farmers Association an direktang benepisyaryo kaini.
An SAAD o Special Area for Agricultural Development sarong programa na nagtatabang tanganing mabawasan an pagtios kan mga parasisira. An GoFFA an igwa nin 62 miyembro kun saen pig-award asin pig-turnover sainda an proyekto na nagkakantidad nin ₱1.78-M kan bulan nin Oktubre kan nakalihis na taon.
An nasambitan man na kantidad pigbibilog kan fingerlings asin mga pambahog para digdi. An programa an pigsasagibo kan BFAR tanganing mas matabangan an mga parasisira na ma-empower an mga ini asin maka-establish nin mga fishery enterprises.
Makalihis an apat na bulan kan pagkaka-turnover an mga parasisira nag-culture asin an mga fingerlings napatalubo ninda kun saen nakagusi an mga ini nin labi 2,000 kilos nin tilapia asin nagkita nin ₱324,000.
Sa ngunyan nasa 2nd cycle na soboot an asosasyon asin nagtao na naman sainda nin 90,000 fingerlings an BFAR tanganing saindang padakulaon asin masustenir an saindang kita.
