Nagtao nin matinding abiso an China komo kasimbagan sa mga planong depense kan Pilipinas, partikularmente na an pagkua kan mga mid-range missile system siring kan Typhon MRC gikan sa Estados Unidos.
Pig-apod kan China na pang-atake an pag-deploy kan mid-range missile system sa Pilipinas kaysa sa pangdepensa sigun ki Ministry of Foreign Affairs spokesperson Mao Ning.
Dugang pa kaini na an pag-deploy kan Typhon MRC system sa Pilipinas an nagbabanta soboot sa interes kan seguridad kan Tsina asin pwedeng magdara nin paglangkaw kan tensiyon sa rehiyon.
Pig-enkaminar kaini an Pilipinas na sunudon an saindang promesa siring kan pagigin neutral asin likayan an mga lakdang na pwedeng makaraot sa interes kan Tsina.
An Typhon system, na kayang maglunsar kan parehong mga karaniwang nuclear warheads, an ipinadara sa Pilipinas komo parte kan mga paghihingowa kan nasyon tanganing pakusogon an depensa kaini kontra sa nagkukusog na presensya kan Tsina sa West Philippine Sea (WPS).
Pigkokonsiderar kan Pilipinas na importante an mga sistemang ini tanganing maprotektaran an soberanya kaini, partikularmente sa exclusive economic zone (EEZ) asin tanganing suportahan an Comprehensive Archipelagic Defense Concept (CADC).
Alagad pighihiling kan Tsina an deployment kaini komo sarong probokasyon na pwedeng magdara nin arm race asin makadisturbo sa katoninongan kan rehiyon.
An tensyon an nagpupuon man sa pag-aako kan Tsina sa haros bilog na WPS, kaibahan an mga parte kan EZZ kan Pilipinas sa ibong kan desisyon kan international arbital kan nakalihis na 2016 na nagbasura sa mga pang-aako kan Tsina, padagos ining nagsasaysay na igwa ining karapatan na sakupon an teritoryo, kaya nagkakaigwa nin madalas na banggaan sa mga lunadang pandagat kan Pilipinas.
Padagos man an pagtataong abiso kan Pilipinas na sunudon an international law, mantang pighurot kan Tsina na baguhon kan Pilipinas an saindang kurso asin pakarhayon an mga isyu sa paagi kan negosasyon.
Sa ibong kan gabos na ini, magkaiba an posisyon na duwang nasyon, kun saen pig-enkaminar kan Tsina an Pilipinas na i-reconsider an estratehiya sa depensa kaini, mientrastanto an Pilipinas an nanindugan na an mga lakdang kaini sa depensa an lehitimo asin nabase sa pambansang interes.
