Pinagpeprepararan na soboot kan Department of Agriculture (DA) an posibleng ibong-ibong na pagtuyaw sa planong pagpapasubasta sa ribu-ribong tonelada kan National Food Authority (NFA) rice.
Sigun ki Agriculture Secretary Francisco Tiu Laurel Jr., sierto na maluwas an mga kritisismo na paramientras puonan na an pagsusubasta sa mga bagas.
Pwede soboot sabihon kan mga kritiko na an bagas an igwang bukbok, o kaya man maluya an kalidad, asin aakusaran an DA kan kapabayaan.
Dugang pa kan sekretaryo, dae malikayan an mga nasambitan ng kritisismo komo resulta kan paghali sa pangkabilogang kapangyarihan kan NFA sa irarom kan Rice Tariffication Law (RTL).
Pigtawan-duon kan sekretaryo na an RTL an nagsisirbing ulang sa kakayahan kan ahensiya na marhay na ipagulong an reserba asin nalilimitaran man an pondo kan ahensiya para sa tamang storage infrastructure siring kan silos asin mga bodega na kayang kontrolon an temperature.
Paliwanag kan sekretaryo, an pagsusubasta an parte kan kasimbagan kan gobyerno sa posibleng kakapusan kan bagas asin tanganing magkaigwa nin bastanteng space an mga bodega kan NFA, para sa mga bagong aning paroy.
Paagi man ini tanganing mailuwas an mga bagas na haloy nang naka-imbak sa mga bodega. Pigkokonsiderar kayang luma an mga bagas kun naka-imbak a an mga ini nin labi tolong bulan.
Mientrastanto, ipinapautob na man an graduated pricing scheme kun isusubasta na an bulto kan bagas.
Mapuon ini sa floor prices na P25.01 hasta P27.96 per kilo depende sa haloy na pagkaimbak kan bagas.
Kapot kan DA an reserbang bagas na 450,000 metriko tonelada – supisyente para sa 12 aldaw kan emergency national supply.
An kabilogang bulto kan ipapasubasta an nagrerepresentar sana sa 13% kan nasambitan ng reserba o labi 1.2 million na sako kan bagas.
