Nagtagama an Department of Agriculture (DA) nin P3.3 bilyon tanganing mapamarhay an ani kan paroy asin mabawasan an pagkalugi makalihis an anihan sa laog kan masunod na tolong taon.
Sigun sa pahayag kan DA kan Huwebes, gagamiton an pondo tanganing magtindog nin 300 drying systems sa bilog na nasyon.
Target kan DA na makumpleto an 145 rice processing systems ngunyan na taon tanganing simbagan an “haloy nang kakulangan sa drying asin milling facilities” na padagos na nagpapasakit sa mga lokal na paraoma kan paroy.
Sa presente, 118 rice processing systems na an naitindog sa bilog na Pilipinas.
Pigsaysay kan ahensya na an natatadang 27 pasilidad ihahatod, ikakabit, asin papakarhayon antes matapos an Disyembre.
Sigun ki Agriculture Secretary Francisco Tiu Laurel Jr., an pagtindog kan 145 rice processing systems sa laog kan tolong taon “sarong antas kan pamumuhunan” na dae pa nagigibo sa historya kan DA.
Basado sa pagtataya kan industriya, pigkakarkulong nagpakol sa 16 porsyento an potensyal na ani kan paroy an nawawara huli sa mga kakulangan makalhis an anihan.
Pigsagibo kan DA an pagpapauswag kan mga pasilidad na ini sa irarom kan mekanisasyon kan Rice Competitiveness Enhancement Fund (RCEF), na obhetong palangkawon an kita asin produktibidad kan mga paraoma nin paroy.
Sigun sa DA, igwang mga dugang na pamumuhunan na pigpreparar tanganing mamantinir an momentum sa natatadang kabangang termino ni Presidente Marcos.
Sigun sa datos kan Philippine Statistics Authority (PSA), pigkakarkulong nagpakol sa 3.93 milyong metric tons (MT) an produksyon kan paroy sa ikatulong quarter kan taon.
Ini an 18.1 porsyento na mas halangkaw kumparar sa aktwal na produksyon na 3.33 milyong MT sa parehas na panahon kan nakalihis na taon.
Naenot nang pigbaba kan DA an forecast para sa produksyon kan paroy sa 2025 huli sa mahewas na pagbaha sa mga pangenot na tanuman.
Nasa pag-ultanan na ini kan 20.09 milyong MT hasta 20.39 milyong MT. Enkaso naabot, malalampasan pa man kaini an record high kan 2023 na 20.06 milyong MT.
