Piglinaw kan Department of Foreign Affairs (DFA) na 20 Pilipino an inarestar asin ikinulong sa Qatar makalihis mag-rally.
Ini an pigkompirmar soboot kan Philippine Ambassador sa Doha, Qatar taliwas sa naenot na report na 17 Pilipino na inarestar huli sa soboot dae otorisadong pagsasagibo nin political demonstrations.
Sigun ki DFA Undersecretary Eduardo de Vega, napalibre na an saro mantang an 19 an nagtitinir sa kustodiya kan Qatar Police Station.
Dugang pa kan opisyak na saindang pigpoporbaran na mapalibre an mga natatadang Pilipino na nasa kustodiya kan mga otoridad.
Pighayag man ni USec. De Vega na enkaso sunadan nin kaso an mga naarestar na Pilipino, matao an Embahada kan Pilipinas sa Qatar nin legal assistance huli ta pwede sindang makulong nin tolong taon.
Marurumduman na nangyari an pagdakop asin pagkulong sa nasambitan ng mga Pilipino kan nakalihis na Marso 28, huli sa soboot political demonstrations.
Alagad maski dae pigtukoy kan Embahada kan PH sa Qatar kun ini an igwang kinaaraman sa mahewasang protesta na piglunsar kan Duterte supporters kasabay kan ika-80 komplianyo ni dating Presidente Rodrigo Duterte na nakakulong sa Scheveningen Prison sa The Hague, Netherlands, sinaysay ni USec. De Vega na posible ini an rason kaya sinda nag-rally.
Liwat man na pinagiromdoman kan DFA Officials sa mga Pilipino na nasa Qatar na mahigot na ipinagbabawal an gabos kan klase kan political rally kaya dapat na magsunod sa ley asin kaugalian kan nasambitan ng nasyon katakod sa pagsasagibo nin mahewasang hiro protesta asin pagpapahayag kan mga politikal na saloobin.
