Pigsierto kan Department of Energy (DOE) na padagos sindang naghihinguha na maibalik an kuryente para sa mga nasalanta kan Super Typhoon Nando katabang an mga pribadong sektor, transmission asin distribution utilities.
Ini an katakod sa kasuguan ni Presidente Ferdinand Marcos Jr. na siguraduhon na igwa nin kuryente an mga mayor na pasilidad siring kan ospital, water systems, evacuation centers, asin man mga residente sa inagihan kan bagyo.
Tulos man na inatasan kan DOE an mga power plant operator asin an National Grid Corporation of the Philippines (NGCP) na rikasan an restoration efforts. Kun saen apat na renewable energy facilities sa Hilagang Luzon an naapektaran. Duwa sa mga ini an Cagayan North Solar Power Plant (100 MW) asin Caparispisan Wind Power Plant (81 MW) na naibalik na sa grid.
Mientrastanto, nagtitinir na offline an Bangui Wind Power Plant (51.9 MW) asin Pagudpud Wind Power Plant, bagaman target maibalik an Bangui ngunyan na Setyembre 23. Sa kabilugan, nagtitinir na bastante an suplay kan kuryente sa Luzon Grid susog sa ahensya.
Katakod kaini naibalik na gabos kan NGCP transmission lines bandang alas-1:05 nin pagkahapon kan nakalihis na aldaw, Setyembre 23 mantang padagos an pagkukumpuni sa Basco Diesel Power Plant sa Batanes.
Limang diesel plants man sa Batanes, Isabela, Apayao, asin Calayan an naka-standby mode.
Pigreport man kan DOE na 32 electric cooperatives sa 22 probinsya an padagos na mino-monitor kun saen 21 sa normal na operasyon, 8 may partial interruption, mantang an INEC (Ilocos Norte), ABRECO (Abra), asin BATANELCO (Batanes) a nagtitinir na mayo pang kuryente.
Basado sa datos kan ahensya nasa 65.94% kan mga banwaan an liwat na naibalik na an kuryente asin padagos an pag-reconnect sa labi sa 638,000 consumer connections.
