Inihayag kan Department of Justice na dae soboot ninda piglalaoman an isinumiteng ‘resignation’ kan presenteng direktor kan National Bureau of Investigation na si Retired Judge Jaime B. Santiago.
Sigun ki Justice Assistant Secretary asin Spokesperson Mico Clavano, ikinabigla kan kagawaran an pagbubutas ni NBI Chief Santiago.
Kaya man saiyang pigtawan pagirumdom an marahay kaining ipinahiling komo lider kan kawanihan na iyong nagustuhan man ni Justice Secretary Jesus Crispin Remulla.
Mantang bahagyang may pagkadismaya man kaining pigheras na an pagbubutas ni NBI Chief Santiago an dae na mababago pa huli ta ini an sarong ‘irrevocable resignation’.
Bagaman dae partikular o sigurado an naggin rason, sigun ki Justice Spokersperson Clavano, personal sobo ining desisyon ni retired judge Santiago.
Kan mahapot man kun igwa nin inirerekumenda an Department of Justice komo karibay ni NBI Chief Santiago, saiyang sinabi na mas marahay na gikan ini sa law enforcement cluster kan kagawaran. Digde kaini pigheras na posibleng si Justice Undersecretary Jesse Andres an karibay paramientras o ‘Officer-in-charge’ kan National Bureau of Investigation.
Alagad ini man an pigtawang linaw ni Justice Secretary Jesus Crispin Remulla sa saiyang sinabi na an pagtatalaga kan ‘OIC’ an mayo soboot sa saiyang opsyon.
Komo pagrespeto ini sa isinumiteng ‘resignation’ ni Retired Judge Jaime Santiago kun saen nakabugtak na matinir ini sa puwesto hasta sa mayo pang naibubugtak komo karibay na panibago.
Marurumdumang nagsumiter kan saiyang ‘irrevocable resignation’ si National Bureau of Investigation Director Jaime B. Santiago kansuarin sana tangani magbutas liwat sa pwesto.
