Nag-deploy an Department of Social Welfare and Development (DSWD) nin psychological first aid team tangani tabangan an mga indibidwal na naapektaran kan linog sa Myanmar kan nakalihis na Marso 28.
Sinabi ni Assistant Secretary Irene Dumlao kan Disaster Response Management Group (DRMG), nag abot an team sa Yangon kan nakalihis na aldaw nin Biyernes, Abril 11, tangani puonan an saindang humanitarian mission.
Pigbibilog ini ninda Social Welfare Officers Imee Rose Castillo, Rizaline Sta. Ines, Nolibelyn Macabagdal, Joseph Salavarria, Clenson Tibangay, Hidie Mendoza, asin man Christina Tatoy, asin kan sarong psychologist na si Karen Arvie Gabriel.
An mga tauhan kan psychological first aid an parte kan mas mahewas na Philippine Rapid Response Deployment Team (RRDT), na pigbibilog kan mga kinatawan gikan sa DSWD, Department of Foreign Affairs (DFA), asin Department of Health (DOH).
Pag abot sa Myanmar, pig ibanhan kan mga miyembro kan RRDT, kaiba pa an mga opisyal kan Philippine Embassy, an mga naulilang pamilya tangani iresiber an mga abo kan duwang Filipino national na binawian nin buhay huli man sa linog.
Sa Pilipinas, pinuonan kan DSWD an counseling sessions para sa mga pamilya kan mga apektadong Overseas Filipino Workers (OFWs), na kadakol sa sainda an mga paratukdo, na nakatalaga sa Myanmar.
