Pigsabat kan dugang-presyo sa mga produktong petrolyo an pagselebrar kan Undas nin huli ta ipapautob an oil price hikes kan mga kompanya nin langis sa nasyon na magigin epektibo saaga, Oktubre 29, 2024.
Sa abiso kan mga kompanya nin langis sa nasyon na pinangentan kan Pilipinas Shell, Petron Corporation, Seaoil, PTT Philippines, Total Philippines, Unioil, Petro Gazz asin Phoenix Petroleum, mapautob sinda nin dugang-presyo na P0.20 sa kada litro kan gasolina asin P0.50 naman sa kada litro kan diesel asin kerosene na magigin epektibo saaga, alas-6 nin pagkaaga.
An ipapautob na dugang-presyo sa mga produktong petrolyo an kawsa kan padagos na paghiro kan presyuhan kaini sa pangkinaban na merkado.
