NAGA CITY- Pigsaysay kan FETODA President sa siyudad nin Naga na dae nagpapabaya an saindang lado tuyong minaabot an kapaskuhan.
Sa entrevista kan Bombo Radyo Naga ki Gil Belen, FETODA President, sinaysay kaini na taon-taon tuyong minaabot an Holiday season yaon an saindang pagtatao nin abiso asin pagpapagirumdom sa saindang mga miyembro na magsunod sa mga ordinansa na pigpapautob sa siyudad tanganing dae mabugtak sa alanganin na sitwasyon.
Katakod kaini, pigtawan duon man kan opisyal na dae soboot malilikayan na igwang magbalgar sa piglatag na mga panundunan alagad kadaklan sa mga nairerehistrong pang-aabuso an kagibuhan kan dae miyembro kan Federasyon.
Ini an kinababalihan kan mga kolurom na lunadan asin nagkapirang mga e-bike users.
Huli digde, padagos an pag-enkaminar kan opisyal sa publiko na enkaso makaeksperyensiya nin pang-aabuso sa mga tricycle driver rumdumon an body number kan lunadan, kuanan nin ladawan asin magdulok sa saindang lado o sa PSO-Naga tanganing matawan nin magkakanigong aksyon.
An mga siring na pangyayari an saindang piglilikayan na magbungkaras orog na ngunyan na siribot an gabos asin pinagpepreparan an pag-abot kan kapaskuhan asin bagong taon.
Sa ngunyan, hagad na sana ni Belen an kooperasyon kan saindang mga miyembro para sa kasalbaduhan kan mga commuters.
