Pig-ako ni dating presidential spokesperson Harry Roque kan nakalihis na Biyernes, Hunyo 20, na inabisuhan kaini si dating Preaidente Rodrigo Duterte na dae na magbweltada sa Pilipinas huli sa naglalalang huma kan pag-arestar kan International Criminal Court (ICC).
Ginibo ni Roque an pahayag sa sarong pagtiripon sa The Hague, Netherlands, tangani girumdumon an ika-100 aldaw nin pagkakadetine ni Duterte, kun saen inilahad pa ni Roque an saindang mga pag-uulay kan enot na parte kan taong 2025 antes man an posibleng pag-arestar sa dating Presidente.
Sigun pa ki Roque, pinagirumduman na kaini an kampo ni Duterte kan taong 2023 na yaraon na an mga ICC investigators sa nasyon.
Siringpaman, sinaysay ni Roque na dae nagpatinag si Duterte asin nagtinir pa man giraray ining determinado na bumalik sa Pilipinas, sinayumahan an ideya kaini nin pagkua nin asylum sa Hong Kong.
Inilahad man ni Roque na liwat nag-book si Duterte nin mas amay na flight gikan sa Hong Kong pasiring Manila, antes ini dagusang arestaron, na susog sa mga tagasuporta, sarong “extraordinary rendition.”
Mientrastanto, presente pa man na nakadetine si Duterte sa ICC mantang nahahampang sa mga kasong may kinaraman sa crimes against humanity katakod kan saiyang madugong “war on drugs.”
