Pormal ng isinumiter kan Judicial and Bar Council an opisyal na listahan o shortlist kan mga nominado sa posisyon pagka-Ombudsman ki Presidente Ferdinand ‘Bongbong’ Marcos Jr. Sa isinagibong deliberasyon kan konseho sa kun siisay an hiling nindang nararapat para sa nasambitan ng pwesto, pito sa mga aplikante an nakabali sa listahan.
Kapansin-pansin sa shortlist kan Judicial and Bar Council an pagkakabali kan presenteng sekretaryo kan Department of Justice na si Sec. Jesus Crispin ‘Boying’ Remulla.
Mantang kaiba man kaini sa listahan sinda former Commission on Audit Chairman Michael Aguinaldo, retired Court of Appeals Associate Justice Stephen Cruz, Supreme Court Associate Justice Samuel Gaerlan, Office of the President Deputy Executive Secretary Anna Liza Logan, retired Supreme Court Associate Justice Mario Lopez, asin Sandiganbayan Associate Justice Michael Frederick Musngi.
Marurumdumang sumalang an 17 aplikante o indibidwal sa pigkundusir na public interview kan Judicial and Bar Council sa Korte Suprema. Isinagibo ini magpuon kan nakalihis na August 28 hasta kan ika petsa 2 kan bulan nin Setyembre sa presenteng taon.
Huli digde, pigheras ni Justice Secretary Jesus Crispin ‘Boying’ Remulla an saiyang reaksyon kan mapabali sa Ombudsman shortlist.
Pighihiling kun ano an posibleng mangyari sa mga masunod kasabay kan pag asegurar na mapadagos pa man an trabaho komo sekretaryo.
Sa presente kaya, saro an Department of Justice sa mga nangengenot na ma-imbestigar dapit sa flood control projects anomaly. Kun saen napuonan na an ‘case buildup’ tangani matukoy an katotohanan asin dagusang masunadan nin mga kaukulang kaso an mga imbwelto sa kontrobersiya.
Mientrastanto, sa urulay man kun pwede na magkasabay na magin sekretaryo asin Ombudsman si Remulla, tulos man kaining pinahimutikan kan justice secretary. Soboot dae ini pwede huli ta magkaibang opisina an duwa na parehong ‘independent constitutional office’.
Huli kaini, obligado ng magpili si Presidente Ferdinand ‘Bongbong’ Marcos Jr. sa kun siisay an saiyang itatalaga komo masunod na Ombudsman.
Marurumdumang nabanggit ni Supreme Court Spokesperson Atty. Camille Sue Mae Ting na sulamenteng sa listahan sana kan Judicial and Bar Council pwedeng pumili an presidente. Asin kun dai man, maikokonsiderar komo ‘unconstitutional’ o di’ naayon sa saligang batas.
