Nanindugan an kampo ni Vice President Sara Duterte na igwang karapatan na gamiton an gabos kan legal remedy kontra sa ipigsunad na impeachment complaint kontra sa panduwang presidente.
Enot na man na pighagad kan kampo kan panduwang presidente sa Korte Suprema na magluwa ini nin sarong temporary restraining order asin writ of preliminary injunction tanganing pugolan an pag-usad kan impeachment trial kontra sa saiya.
Sigun ki Atty. Sheila Sison, an lead legal counsel an panduwang Presidente, parte sana ini kan legal remedy na pwedeng gibuhon ni VP Sara, salig sa ley.
Rason kan batikang abogado, bakong ‘absolute’ an kapangyarihan kan Kamara na mag-initiate kan gabos na kaso kan impeachment.
Dapat soboot nasusunod an mga constitutional standard siring kan paagi nin pagsunad nin complaint, komo kan mga botong kaipuhan tanganing mag-usad an reklamo, one-year constitutional ban, asin iba pa.
Binatikos man ni Atty. Sison an mga kongresista na nagtuyaw sa nagin aksiyon kan kampo kan panduwang Presidente na dae man pigbabasa asin pig-aadalan an merito kan ipigsunad na petisyon.
Mientrastanto, pig-enkaminar kan kampo kan panduwang Presidente an Korte Suprema na simbagan na an saindang petisyon antes pa man puonan kan Senado an trial.
Rason ni Sison, kwestiyonable an nag-uusad na impeachment complaint asin igwang mga constitutional problem na nakapalaog digde.
