NAGA CITY- Nagpuon na an mga deboto asin parishioner sa saindang pigsasagibo na Visita Iglesia katakod sa pag-obserbar kan Semanta Santa.
Sa entrevista kan Bombo Radyo Naga ki Rev. Fr Mark Emmanuel DP Real, Parish Priest kan Immaculate Concepcion, sinaysay kaini na igwa nang mga deboto gikan sa ibang mga lugar sa nasyon an nagbibisita sa mga simbahan partikular sa siyudad nin Naga.
Sigun ki Fr. Real, obheto kan nasambitan ng aktibidad na mas papusugon pa kan lambang mga tawo an saindang religious asin spiritual na pagtubod sa Kagurangnan.
An pagbisita soboot sa mga simbahan o inaapod na Visita Iglesia an paagi kan mga deboto tanganing manumpungan an Kagurangnan asin makahagad nin pag-bendisyon.
Paliwanag pa kaini na an mga tawo igwang kanya-kanyang paagi sa pag-obserbar kan Holy Week alagad dae soboot malingawan kan mga ini an pinakarason sa paggibo kan mga aktibidad na igwang kinaaraman sa Semana Santa.
Ini an magkaigwa nin marhay na pagbabago sa sadiri komo pagpapasalamat sa pagpapakasakit ni Hesu Kristo sa krus tanganing tubuson an kasalan kan mga tawo.
Sa ngunyan, pigsaysay man ni Fr. Real na welcome an gabos na magbisita sa saindang Parokya sa Immaculate Concepcion siringman sa gabos na simbahan sa bilog na siyudad nin Naga.
