Nangapudan si Senador Erwin Tulfo na maseguro na makikinabang man an milyones na mga motorista sa excise tax suspension plan sa petrolyo na ipigtulod kan gobyerno tanganing maibsan an epekto kan halangkaw na presyo kan petrolyo.
Durante kan pagdangog kan Senate Committee on Ways and Means kan Marso 11, nagpatanid si Tulfo laban sa posibilidad na sakop sana an diesel bilang tax relief. Sinabi niya na dakol na motorista, na gagamit nin gasolina, an mawawalat kun limitado sana sa diesel an suspension kan excise tax. Lana asin Gas
Segun sa senador, pigkakarkulong nasa 8.5 milyones na mga Pilipino an naggagamit nin motorsiklo aroaldaw bilang saindang pangenot na transportasyon pasiring sa trabaho o bilang paagi nin pagbuhay.
Bilang simbag, si Usec. Karlo Adriano kan Department of Finance na kokonsideraron kan Development Budget Coordination Committee asin kan Department of Energy (DOE) an proposal tanganing makagibo nin mas komprehensibong rekomendasyon para sa Presidente.
Mientrastanto, nagpatanid man si Tulfo kontra sa posibleng pamulitika kan distribusyon kan fuel subsidy.
Pigduon kan senador na dae dapat gamiton kan mga pulitiko an oil price crisis para sa personal na ganansya. Hale suboot sa buwis an cuartang ipapanao sa mga tawo, kaya dae dapat magkaigwa nin pakikiaram an mga politico sa pagdistribwir kaini.
