NAGA CITY- Nakareseber an mga paraoma na naapektaran sa pagtama kan African Swine Fever sa Bicol Region nin nasa kabilugang P236.5 million na asistensiya gikan sa Department of Agriculture.
Sigun ki Lovella Guarin, pamayo kan DA Regional Agriculture and Fisheries Information Section, pig-release kan ahensiya an pondo sa irarom kan Integrated National Swine Production Iniatives for Recovery and Expansion Program.
Nagpakol sa nasa 43 na farmer cooperatives asin associations, na-accredited kan DA an nakareseber nin nasa P5.5 million kada saro.
An gabos na nakareseber nin pondo kaipuhan na magkonstruher nin biosecurity facility na igwang desinyo tanganing malikayan an pagkuriyat pa kan helang sa mga farm.
Apwera sa pasilidad, igwa man nin nasa 100 na piglets asin pagkakan na kayang sustenaran an mga ataman na orig.
Obheto kan programa na liwat na buhayon an hog industry sa Rehiyon na orog na naapektaran huli sa ASF, masimbagan an kakulangan sa mga piglets, magtao nin trabaho sa mga dating swine raisers, asin masierto an ownership asin sustainability kan intervention.
Huli kaini an hog production sa Bicol an piglalaoman na maglangkaw sa mga masunod na taon sa paagi kan mga lakdang na saindang nareseber.
Marurumduman, an produksyon an padikit-dikit naman na nakakarekober kan nakalihis na taon kun saen nakapag-generate nin nasa 1.7 million na orig asin nakalaog an rehiyon sa ika-sampulong pwesto para sa swine production sa nasyon.
